Өзбекстанда Рамазан айында мұқтаж отбасыларға 1 миллион сом берілмек
Өзбекстанда қаулыға сәйкес, әлеуметтік тізілімдегі «мемлекеттік қамқорлықтағы отбасы» санатына жататын жанұяларға, жалғыз тұратын және күтімді қажет ететін қарт азаматтарға, мүгедектігі бар адамдарға, сондай-ақ жетімдер мен ата-анасының қамқорлығынсыз қалған балалар тұратын отбасыларға 1 миллион сум көлемінде біржолғы материалдық көмек төленеді,- деп хабарлайды saraptime.kz
Сонымен қатар, әлеуметтік тізілімдегі «аз қамтылған отбасы» санатына жататын жанұяларға және «махалла жетілігі» қалыптастыратын қосымша тізімге енгізілген мұқтаж отбасыларға 500 мың сум мөлшерінде біржолғы материалдық көмек көрсетіледі. Бұл ретте қосымша тізімге енгізілетін отбасылар саны тиісті өңірдегі «мемлекеттік қамқорлықтағы отбасы» санатындағы жалпы отбасылар санының 20 пайызынан аспауы тиіс.
Сондай-ақ әлеуметтік тізілімге енгізілген отбасылардың сырқаттанған 6 мың мүшесінің емделу және хирургиялық операция шығындары өтеледі. Мұқтаж азаматтарды медициналық мекемелерге жолдау және көрсетілетін қызметтердің ақысын төлеу 1 наурызға дейін іске қосылуы жоспарланған жеке ақпараттық модуль арқылы ұйымдастырылады.
Аталған шараларды қаржыландыру үшін «Вакф» қорына 800 миллиард сум бөлу көзделген. Төленетін материалдық көмек жеке тұлғалардың табыс салығын есептеу кезінде жиынтық табыс құрамына енгізілмейтіні белгіленді.
Көмек алушылардың тізімін Әлеуметтік қорғау ұлттық агенттігі мен махаллалар 5 күн ішінде қалыптастырып, «Вакф» қорына ұсынады. Қаражат 2026 жылғы 1 наурызға дейін «Халк банк» арқылы азаматтардың әлеуметтік карталарына немесе банк карталарына аударылады.
