Отбасы мен неке мәселесі: Конституцияда не жаңарады?
Жаңа Конституцияда отбасы мен неке мәселелеріне қатысты норма енгізіледі. Маңғыстау облысы Іскер әйелдер кеңесінің мүшесі, өңірлік Қоғамдық кеңестің өкілі, Үнді этномәдени бірлестігінің төрайымы Надежда Вадодария Lada.kz сайтына аталған өзгерістердің азаматтарға қалай әсер етуі мүмкін екені туралы сараптамалық пікірін бөлісті, деп хабарлайды saraptime.kz
Жаңа Конституция жобасында неке мен отбасы мәселелерін реттейтін бап кеңейтілген. Жаңартылған редакцияда мынадай норма бекітіледі:
Неке — заңға сәйкес мемлекетте тіркелген ерікті және тең құқықты ер мен әйелдің одағы.
Надежда Вадодарияның айтуынша, Конституцияның жаңартылған редакциясы некедегі тең құқық қағидатын нақты бекітеді және әйелдердің құқықтарын қорғау кепілдіктерін күшейтеді. Норма ерлі-зайыптылардың тең құқықтары мен міндеттерін, қызмет түрін, мамандығын және дінін еркін таңдауын, сондай-ақ бала тәрбиесі мен отбасылық өмір мәселелерін бірлесіп шешуін қарастырады.
30-бап Конституцияның негізгі құндылықтарын — теңдік, өзара құрмет және әлеуметтік әділеттілікті көрсетеді. Ол отбасының қоғамдағы басты институт екенін, ерлі-зайыптылардың тең құқықтары мен міндеттері бар екенін айқындайды. Бұл ереже адам құқықтары мен гендерлік теңдік жөніндегі халықаралық стандарттарға сәйкес келеді. Қазіргі әлеуметтік өзгерістер жағдайында аталған бап дәстүрлі құндылықтар мен отбасылық қатынастардың жаңа үлгілерін үйлестіруге құқықтық негіз болып, балаларды қорғауды және әлеуметтік тұрақтылықты нығайтуды қамтамасыз етеді, — деді Надежда Вадодария.
Қарапайым тілмен айтқанда, бұл жаңашылдық ер мен әйелдің тең құқықты одағын бекітеді және әйелдің келісімінсіз некеге тұру мүмкіндігін жоққа шығарады.
Сонымен қатар, сарапшы бұл норманың некенің құқықтық анықтамасын нақтылауда және дәстүрлі отбасылық құндылықтарды қорғауда маңызды рөл атқаратынын атап өтті.
Аталған норма некені ер мен әйелдің одағы ретінде тікелей бекітеді. Бұған дейін қолданыстағы Конституцияда мұндай нақты тұжырым болмаған. Бұл біржынысты некелерді тіркеу мүмкіндігін болдырмауға мүмкіндік береді, — деп қорытындылады Надежда Вадодария.
