АҚШ-та суықтан 85 адам ажал құшты
АҚШ-та қатты аяз салдарынан қаза тапқандар саны 85 адамға жетті,- деп хабарлайды saraptime.kz
«Техастан Нью-Джерсиге дейінгі аумақтарда қатты суықтан кемінде 85 адам көз жұмды. Қайтыс болғандардың шамамен жартысы Теннесси, Миссисипи және Луизиана штаттарына тиесілі», – делінген хабарламада.
АҚШ-тың Ұлттық метеорологиялық қызметінің мәліметінше, Теннесси штатындағы Нэшвилл қаласында ауа температурасы 10 градусқа дейін төмендейді деп күтілуде. Қалада әлі де 79 мыңнан астам ғимарат электр қуатынсыз қалып отыр.
CBS News арнасы 29 қаңтарда АҚШ-та дауыл салдарынан қаза тапқандар саны 73 адамға жеткенін хабарлаған. Телеарнаның дерегінше, олардың 49-ы ауа райы жағдайларымен немесе қолайсыз ауа райынан туындаған жазатайым оқиғалармен байланысты болған. Бірқатар штаттардың билігі тағы 24 адамның қаза тапқанын мәлімдеді. Сондай-ақ метеорологиялық қызмет АҚШ-қа қарай оңтүстікке жылжып келе жатқан жаңа арктикалық циклон туралы ескертті. Ол апта соңына қарай ел аумағына жетіп, төмен температура бойынша жаңа рекордтар орнатуы мүмкін.
АҚШ билігі шұғыл шаралар қабылдауда: Нью-Йоркте жылыну үшін 50-ден астам аурухана мен баспана ашылды, ал Далласта шамамен 1150 үйсіз адам орналастырылды. 50 см-ден астам қар түскен Питтсбург қаласында аяз салдарынан 37 қар тазалау техникасы істен шықты. Миссисипи штатының губернаторы Тейт Ривз салдарын жоюға көмектесу үшін Ұлттық гвардияның 500 әскери қызметкерін жұмылдырды.
