Испанияда 16 жасқа толмаған балаларға әлеуметтік желілерді пайдалануға тыйым салынуы мүмкін
Испания билігі 16 жасқа толмаған балалардың әлеуметтік желілерді пайдалануына тыйым енгізуді жоспарлап отыр. Бұл туралы елдің премьер-министрі Педро Санчес 3 ақпанда Дубайда өткен Дүниежүзілік үкіметтік саммиттің пленарлық отырысында мәлімдеді,- деп хабарлайды saraptime.kz
Оның айтуынша, цифрлық платформалар жасты тиімді тексеру жүйелерін енгізуге міндетті болады.
Politico басылымының мәліметінше, тиісті түзету Испанияның министрлер кеңесінде келесі аптада-ақ мақұлдануы мүмкін. Құжатта 16 жасқа толмаған пайдаланушыларға цифрлық платформаларда тіркелуге тікелей тыйым салу қарастырылған.
Бұл бастама цифрлық ортаға мемлекеттік бақылауды күшейтуге бағытталған кең ауқымды шаралар пакеті аясында ұсынылып отыр. Атап айтқанда, әлеуметтік желілер басшыларын заңсыз контентті орналастырғаны үшін заңдық жауапкершілікке тарту, сондай-ақ дезинформациямен, өшпенділік тілімен және балалар порнографиясы материалдарының таралуымен күресті күшейту көзделген.
Осыған ұқсас шектеулер Франция, Дания және Португалия сияқты елдерде де талқылануда. Ал Австралия 16 жасқа толмаған тұлғаларға әлеуметтік желілерді пайдалануға толық тыйым салған әлемдегі алғашқы ел атанды.
